Manoramaonline.com no longer supports Internet Explorer 8 or earlier. Please upgrade your browser.  Learn more »
sponcers

സിറോ മലബാർ സഭാംഗങ്ങളുടെ ആഴമേറിയ വിശ്വാസവും സമർപ്പണ മനോഭാവവും മാതൃകാപരം: കർദ്ദിനാൾ ലെയനാർദോ സാന്ദ്രി

മെൽബൺ∙സിറോ മലബാർ സഭാ മക്കളുടെ ആഴമേറിയ വിശ്വാസവും സമർപ്പണ മനോഭാവവും ഓസ്ട്രേലിയയിലെ ഇതര ക്രൈസ്തവ സമൂഹങ്ങൾക്ക് മാതൃകയാണെന്ന് പൗരസ്ത്യ സഭകൾക്കുള്ള തിരുസംഘത്തിന്റെ അധ്യക്ഷൻ കർദ്ദിനാൾ ലെയാനാർദോ സാന്ദ്രി. മെൽബൺ സെന്റ് തോമസ് സിറോ മലബാർ രൂപത നൽകിയ സ്വീകരണത്തിൽ പങ്കെടുത്ത് സംസാരിക്കുകയായിരുന്നു കർദ്ദിനാൾ സാന്ദ്രി. ബിഷപ്പ് ബോസ്കോ പുത്തൂരിന്റെ നേതൃത്വത്തിൽ കൂടുതൽ വളരാൻ ഓസ്ട്രേലിയായിലെ സിറോ മലബാർ രൂപതക്ക് സാധിക്കട്ടെ എന്ന് പിതാവ് ആശംസിച്ചു.

ഡാൻഡിനോങ്ങ് സെന്റ് ജോൺസ് കോളേജിൽ എത്തിച്ചേർന്ന കർദ്ദിനാൾ ലെയാനാർദോ സാന്ദ്രിയ്ക്കും  മാർപ്പാപ്പയുടെ ഓസ്ട്രേലിയായിലെ സ്ഥിരം പ്രതിനിധി അഡോൾഫോ റ്റിറ്റൊ യലാന മെത്രാപ്പോലിത്തായ്ക്കും വിശിഷ്ട വ്യക്തികൾക്കും രൂപതാധ്യക്ഷൻ മാർ ബോസ്കോ പുത്തൂർ, വികാരി ജനറൾ മോൺ. ഫ്രാൻസിസ് കോലഞ്ചേരി, മെൽബൺ സൗത്ത് ഈസ്റ്റ് ഇടവക വികാരി ഫാ. എബ്രഹാം കുന്നത്തോളി എന്നിവരുടെ നേതൃത്വത്തിൽ സ്വീകരണം നൽകി. തുടർന്ന് കോളജ് ഓഡിറ്റോറിയത്തിൽ നടന്ന ദിവ്യബലിയിൽ മാർ ബോസ്കോ പുത്തൂർ മുഖ്യകാർമ്മികത്വം വഹിച്ചു. ഓസ്ട്രേലിയയിലെ ഇതര പൗരസ്ത്യ സഭാപിതാക്കന്മാരും രൂപതയിൽ സേവനം ചെയ്യുന്ന വൈദികരും സഹകാർമ്മികരായി. കർദ്ദിനാൾ ലെയാനാർദോ സാന്ദ്രി വചനസന്ദേശം നൽകി.

കത്തീഡ്രൽ ഇടവകയിലെ മതബോധന വിദ്യാർത്ഥികൾ അവതരിപ്പിച്ച രംഗപൂജയോടെ പൊതുയോഗം ആരംഭിച്ചു. സീറോ മലബാർ സഭയുടെയും ഓസ്ട്രേലിയായിലെ സിറോ മലബാർ രൂപതയുടെയും വളർച്ചാഘട്ടങ്ങൾ പ്രതിപാദിക്കുന്ന വീഡിയോ സദസ്സ് ഹർഷാരവത്തോടെ വരവേറ്റു.  മാർ ബോസ്കോ പുത്തൂർ ചടങ്ങിൽ സ്വാഗതം ആശംസിച്ചു. സെന്റ് തോമസ് സൗത്ത് ഈസ്റ്റ് ഇടവക ദേവാലയത്തിനായി വാങ്ങിയിരിക്കുന്ന സ്ഥലം വിശ്വാസികൾക്കായി സമർപ്പിക്കുന്ന കർമ്മം കർദ്ദിനാൾ ലെയാനാർദോ സാന്ദ്രി നിർവ്വഹിച്ചു.

സിറോ മലബാർ ദൈവാലയങ്ങളിലെ കുട്ടികളുടെയും യുവാക്കളുടെയും വർധിച്ച പങ്കാളിത്തം ശ്ലാഘനീയമാണെന്ന് തുടർന്ന് പ്രസംഗിച്ച അഡോൾഫോ റ്റിറ്റൊ യലാന മെത്രാപ്പോലിത്ത അഭിപ്രായപ്പെട്ടു. 2017 നവംബറിൽ രൂപതയുടെ നേതൃത്വത്തിൽ ഓസ്ട്രേലിയായിലെ വിവിധ പ്രദേശങ്ങളിൽ നടത്തപ്പെടുന്ന റെക്സ്ബാൻഡ് ഓസ്ട്രേലിയ-2017 ടിക്കറ്റുകളുടെ വിതരണം ഗ്രേറ്റർ ഡാൻഡിനോങ്ങ് മേയർ ജിം മേമെറ്റി പ്രധാന സ്പോൺസർമാരായ കാത്തലിക് സൂപ്പർ, ഫൈവ് സ്റ്റാർ പ്രോപ്പർട്ടീസ് എന്നിവയുടെ പ്രതിനിധികൾക്ക് നൽകികൊണ്ട് ഉദ്ഘാടനം ചെയ്തു. പാസ്റ്ററൽ കൗൺസിൽ സെക്രട്ടറി ജീൻ തലാപ്പിള്ളിൽ കൃതഞ്ജത അർപ്പിച്ചു.
 
രൂപതാധ്യക്ഷൻ മാർ ബോസ്കോ പുത്തൂർ, വികാരി ജനറാൾ മോൺ. ഫ്രാൻസിസ് കോലഞ്ചേരി, ചാൻസിലർ ഫാ. മാത്യു കൊച്ചുപുരയ്ക്കൽ, സൗത്ത് ഈസ്റ്റ് ഇടവക വികാരി ഫാ. എബ്രഹാം കുന്നത്തോളി എന്നിവരുടെ നേതൃത്വത്തിൽ വിവിധ കമ്മിറ്റികളുടെ കൂട്ടായ പ്രവർത്തനം ചടങ്ങുകൾ മനോഹരമാക്കുന്നതിൽ മുഖ്യ പങ്കുവഹിച്ചു. റോമൻ കൂരിയായിൽ നിന്നുള്ള പ്രതിനിധികളുടെ പ്രഥമ രൂപത സന്ദർശനം സംഘാടക മികവു കൊണ്ട് ശ്രദ്ധേയമായി.


ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.